Oinarrizko gaitasunak

Hezkuntzaren Lege Organikoaren berritasunetako bat oinarrizko gaitasunei curriculumeko arlo guztietan ematen zaien tratamendua da. TribuCan proiektuak, bere garapenean, gaitasun horiek ikasten laguntzen du.

Hezkuntzaren arloko Europako Batzordeak pertsonek bizitzan zehar ikasteko behar dituzten gaitasun nagusiak edo trebetasunak ezarri ditu, eta estatu kideak bultzatu ditu beren hezkuntza politikak norabide horretara zuzen ditzaten.
Gaitasun horiei oinarrizkoak deitu izan zaie Hezkuntzaren Lege Organikoan. Desberdintasunen bat badago Europakoekiko, baina funtsean berak dira.

Gaitasun nagusi edo oinarrizkotzat jotzen da eskari konplexuei erantzuteko eta egin beharrekoak modu egokian egiteko gaitasuna izatea.
Trebetasun praktikoen, ezagutzen, motibazioen, balio etikoen, jarreren, emozioen eta ekintza eraginkor bat lortzeko batera lan egiten duten bestelako osagai sozial batzuen nahasketa bat eskatzen du.
Gaitasun nagusiak dira pertsonaren errealizazioaren, gizarteratzearen, herritartasun aktiboaren eta enpleguaren oinarria direnak.

Honakoak dira TribuCan proiektuan lantzen diren oinarrizko gaitasunak:

1. Komunikazio linguistikorako gaitasun

Komunikazio linguistikorako gaitasuna esaten denean, ahozko eta idatzizko komunikaziorako, ikasteko eta jokabideak eta emozioak erregulatzeko tresna gisa hizkuntza erabiltzeaz ari gara.
Atzerriko hizkuntzetan komunikatzeak bitartekaritza eta kulturen arteko ulermena bezalako gaitasunak edukitzea exijitzen du.
Gaitasun hori lagungarri gertatzen da irudi pertsonal positiboa edukitzeko, eta gainerakoekiko eta ingurunearekiko harreman eraikitzaileak izatea sustatzen du. Komunikatzen ikastea beste pertsona batzuekin loturak ezartzea da; ezagutzen diren neurrian kontsiderazioa ea afektua sentiarazten diguten kultura berrietara hurbiltzea.
Gaitasun linguistikoa garatzea funtsezkoa da gatazkak ebazten ikasteko eta elkarrekin bizitzen ikasteko.

TribuCan proiektuaren arabera, beharrezkoa da Internet bidez edo eskolako liburutegin lorturiko informazio-iturriak ulertuz irakurtzen jakitea; ikasgela birtualean planteaturiko jardueretako galderen erantzunak zuzentasunez idaztea, eta ahozko hizkuntza arintasunez erabiltzea taldean eta ikasgelan gure proposamenak defenditu ahal izateko. Gainera, ikasturtea hiru hizkuntza erabiliz garatu daiteke: gaztelania, euskara eta ingelesa.

2. Matematikarako gaitasuna

Informazioak sortu eta interpretatzeko, zenbakiak eta haien oinarrizko eragiketak, sinboloak eta matematikazko adierazpideak eta arrazoitzeak erabiltzeko trebetasuna da; errealitateari buruzko alderdi kuantitatibo eta espazialak hobeki ezagutzeko eta eguneroko bizitzarekin eta lan munduarekin loturiko arazoak ebazteko trebetasuna.

TribuCan proiektuan matematikako gaitasuna enpresa-plana prestatzeko erabiltzen da: merkatuari buruzko azterketa, produkzio plana, finantziazioa eta abar.

3. Mundu fisikoa ezagutzeko eta harekin elkarreragina izateko gaitasuna

Mundu fisikoarekin elkarreragina izateko trebetasuna da, bai alderdi naturalei dagokienez, bai giza ekintzak sorturiko alderdiei dagokienez ere, halako moduan non errazago eginen duen gertakarien ulermena, ondorioen aurresatea eta norberaren, beste gizon-emakumeen eta gainerako bizidunen bizitzaren baldintzak hobetzera eta babestera zuzendutako jarduera.

TribuCan proiektuan aztertzen diren gaien testuinguru geografiko, sozial eta ekonomikoa aztertzen dira ezer baino lehen

4. Informazioaren tratamendua eta gaitasun digitala

Informazioa bilatu, lortu, prozesatu eta komunikatzeko eta hura ezagutza bihurtzeko trebetasuna da.

Alderdi desberdinak hartzen ditu, hasi informazioa eskuratzetik eta hautatzetik eta informazio hori euskarri desberdinetan erabili eta transmititzera bitarte, horren barne direla informazioaren eta komunikazioaren teknologiak informatzeko eta komunikatzeko funtsezko elementu gisa erabiltzea.

Tribucan proiektuaren metodologia, funtsean, teknologia berrien erabileran oinarritzen da, eta behar diren baliabideak eskaintzen ditu ikasleak ongi erabil dezan Internetek eskaintzen dion informazioa.

5. Gaitasun soziala eta herritar gisako gaitasuna

Gaitasun honek bidea ematen du gizartean bizitzeko, bizi garen munduaren errealitate soziala ulertzeko eta herritartasun demokratikoaz baliatzeko. Banakako jokabide moduak biltzen ditu, eta jokabide modu horiek ahalmena ematen diete pertsonei gero eta gizarte anitzago batean bizitzeko, besteekin harremanak izateko, lankidetzan jarduteko, konprometitzeko eta gatazkei aurre egiteko. Gaitasun hori barneratzeak esan nahi du gauza izatea bestearen tokian jartzeko eta desberdintasunak onartzeko, tolerantea izatea eta gainerakoen baloreak, sinesmenak, kulturak eta historia pertsonala eta kolektiboa errespetatzea.

TribuCan proiektuak, bereziki, elkartasunaren izpiritua ikasturtean zehar ikastetxe bakoitzak garatuko duen elkartasunezko proiektu ekintzaile baten bitartez gauzatu nahi du. Hirugarren munduko eta mundu horretako jendearen benetako arazoak ere lantzen ditu, haien kulturak eta bizimoduak aztertzeaz gainera.

6. Gaitasun kulturala eta artistikoa

Gaitasun honek berekin dakar agerpen kultural eta artistikoak aintzat hartzea, ulertzea eta kritikotasunez baloratzea, eta agerpen horiek gozamenerako eta norberaren aberasgarri gisa erabiltzea eta herrien kultur ondarearen zati gisa hartzea.

TribuCan proiektuak jendearen kultura, artea eta historia aztertzen ditu, bai eta jendearen bizimodua ulertzen laguntzen duten alderdi guztiak ere.

7. Ikasten ikasteko gaitasuna

Ikasten ikasteak esan nahi du ikasten hastea eta horri jarraipena emateko gauza izatea. Esan nahi du, halaber, zalantza kasuetan jokatzen jakitea, ezagutza arrazionalaren logika asebeteko duten erantzunak bilatzen saiatuz. Berekin dakar arazo berarentzat balizko erantzun bat baino gehiago daudela onartzea eta motibazioa aurkitzea erantzun horiek ikuspegi metodologiko desberdinen bitartez aurkitzeko.

TribuCan proiektuak, ekintzailearen nolakotasunak aztertzearen bitartez, aukera ematen die ikasleei beren ikaskuntza antolatzeko, bai banakakoa, bai taldekoa; aukera ematen du, halaber, aztertutako egitateei buruz gogoeta kritikoa egiteko, eta aukera ematen du, azkenik, jarraikortasun eta motibazio jarrerak garatzeko eta norberaren buruarengan konfiantza izateko.

8. Autonomia eta ekimen pertsonala

Gaitasun honetan biltzen da bakoitzak bere irizpideen arabera jokatzeko modua izatea, eta gauza izatea egindako aukera garatzeko behar diren ekimen guztiak aurrera eramateko; halaber, egindako aukeraren erantzukizuna hartzea, bai arlo pertsonalean, bai arlo sozialean edo lan arloan ere.

TribuCan proiektuak enpresa solidario bat sortzea proposatzen du; haren bidez, ikasleak bere ekimenak erakusteko jarrera egokia garatu ahal izanen du.

Ondorioa
TribuCan proiektua lagungarri gertatzen da ikasleak bere helburu pertsonal, akademiko eta lanekoak lortzeko behar dituen oinarrizko gaitasunak hobetzeko.